Seux si d’licat

Monologue
(A dire avec un air niais)
Le Bourrin

I
Seux in p’tit porté su la goule
Oh... o m’en faut pas jholiement!
Sans farci, peux pas manjher d’poule
 Ni dau bouilli d’boeu sans piment !
Seux délicat prr’ les monjhettes,
Sans l’heûl’ de noix, zou troue pas bon, 
Jh’aim’ beun thyé zeuils dans moun’ assiette, 
Dans ma salade, faut-t-in « Chapon » !
 O l’est pas que jh’sey’ de grande vie,
Jhe manjh’ pas grou... mais in bon piat
Et la beurgosse, o me r’sazie...
Seux si d’licat !

II
Tenez, rin qu’ prr’ les patat’s frites
S’o ya d’I’ègnon, zou manjhe à r’gret,
O me charjhe le thyieur tout d’suite,
(les manjh’ qu’à la graiss’ de goret) !
Jhe les z’aim’ séch’s coum in cot d’trique,
Coumment peuris-jhi comparé :
Sèches coum’ l’échin’ d’in’ veill’ bique
Oub’ l’impôt d’solidarité !
O l’est encoèr’ coum prr’ la daube,
S’o ya pas d’lard avec dau gras
O yat pas d’danjher que jh’ m’échaude :
Seux si d’licat !

III
Jh’aim’ pas l’pouésson... à caus’ des bordes
Et peux... o sent l’fraichinat!
Manjh’rai in’ cagouill’ quant a borde
Avec de l’ail et dau peursat !
Quant me trouvinrai pas d’boun’ mâche
Manjh’rai encoèr’ in bout d’boudin,
Boudin national au sang d’vache.
Ou beun in saucisson d’bourrin !
 Mais prr’ le pâté d’chértuit’rie,
Peuris pas... le thyieur me peut’rat:
O m’rend la pire aigueurzie... Seux si d’licat !

IV
Oh!,., bouèrai beun de la piquette
I dizant qu’o ya reun de pu bon
 Pac qu’o vous mont’ pas à la tête
Et qu’o vous fout pas l’thyieuracon!
Mais que v’lez-vous, jh’ai ma manie:
Jhe met ma bouteille dans n’in siâ,
A défaut dau vin d’Aljhérie,
Jhe veux bouèr’ frais, freit coum’ in yià. (*)
Eh, jhe sais beun qu’o l’est dau lusque.
Mais que v’lez-vous? n’on n’se r’fait pas,
La piquett’ chaude,  o m’offusque:
Seux si d’licat !

V
Seux d’licat mais pas difficile.
Demand’ point dau jhigot d’mouton,
Mais Jh’aim’ beun les sardines à l’huile
Les ris d’viâ, ou beun le graton !
Veùris manjher, si o s’adounne
Ine langouste oub’ n’in homard! 
Seux pas gormand... mais Dieu m’pardounne,
O m’ fiatt’rait les balots, d’hazard !
Ah ! O l’est là que jh’ s’ris beunaize,
Mais o coût’ trois cents francs l’mourcà
Et jh’ peux pas m’ passer d’mayonnaise !
Seux si d’licat !


(*). Freit coum’ in yiâ: froid comme un glaçon.

extrait de la page 420 du livre "Goulebenéze, le charentais par excellence" Ed. le Croit vif

Ce monologue est extrait du disque N° AG70.09

Edité par AGORILA avec leur aimable permission et intitulé

"Veillée Saintongeaise"